என் எழுத்து...

பாக்டீரியாக்கள் பேசிக்கொள்ள ஒரு மொழி உண்டு என்று சொன்னால், எத்தனை பேர் நம்புவார்கள்? ஆனால், உண்மையில் அவைகளுக்கென்று ஒரு தனி மொழி இருக்கிறது, இம்மொழியைக்கொண்டு பேசி கலந்தாலோசித்துவிட்டுத்தான் பல முக்கிய வேலைகளை செய்கின்றன என்று ஆய்வு முடிவுகள் சொல்கின்றன. பாக்டீரியாக்களின் அந்த சங்கேத மொழியை பல ஆண்டுகளாக ஆராய்ச்சி செய்து அதில் சில வார்த்தைகளை மனிதர்களாகிய நாம் கற்றுக்கொண்டுள்ளோம். நம்பமுடியவில்லையா? ஆம், பாக்டீரியாக்கள் தங்களுக்குள் தொடர்புகொள்ள, சில வேதிப்பொருட்களை தயாரித்து அதன் சுற்றுப்புறத்துக்கு அனுப்புகிறது. அப்படி அனுப்பப்பட்ட வேதிப்பொருட்களை உணர்வதன் மூலம் யார் தம் சுற்றத்தார் என்பதை தெரிந்துகொள்கிறது. நுண்ணுயிரிகளின் இந்த திறனை ஆராய்ச்சியாளர்கள்,  'குவாரம் சென்சிங்' (Quorum sensing) என்று சொல்கிறார்கள்.

ஒரு ஒரு-செல்உயிரிக்கு இந்த திறன் எதர்க்கு என்ற கேள்வி எழுகிறது, இல்லையா? ஆனால், இக்குணங்கள் பரினாம வளர்ச்சியில் தத்தம்  இனத்தின் வளர்ச்சிக்காகவும், அனுகூலமற்ற புறச்சூழல்களிலிருந்து காப்பதர்க்காகவும், தீங்குவிளைவிக்கக்கூடிய மற்ற உயிரிகளிடமிருந்து பாதுகாக்கவும், அவற்றை எதிர்க்கவும் ஏற்படுத்திக்கொள்ளப்பட்டவையாகக் கருதப்படுகிறது.

பாக்டீரியாவை தன்னுள் கொண்ட மெல்லுடலி

'விப்ரியோ பிசுசரி' (vibrio fischeri) என்ற ஒரு கடல் வாழ் பாக்டீரியாவில் இந்த குவாரம் சென்சிங்கை முதன்முதலில் கண்டுபிடித்தவர் 'போணி பேசுலர்' (Bonnie Bassler). இந்த பாக்டீரியாக்கள், பகலில் மணலுக்கு அடியிலும், இரவில் கடல் மேல்பரப்பில் வந்து இரைதேடும்,  ஒரு வகை  மெல்லுடலிகள் வகையைச்சார்ந்த உயிரினத்தின்உடலுக்குள் இருந்து கொண்டு, இரவில் ஒளிரக்கூடிய திறன் கொண்டது. இதில் ஆச்சரியம் என்னவென்றால், இந்த பாக்டீரியாக்கள், ஒரு குறிப்பிட்ட எண்ணிக்கையை அடைந்தவுடந்தான் ஒளிர்வதர்க்கான புரதத்தை சுரக்கின்றன. அதற்குமுன் இதை செய்வதில்லை. தங்களின் எண்ணிக்கையை குவாரம் சென்சிங்கின் மூலமாகத்தான் அறிந்துகொள்கின்றன என்று பேசுலர் கண்டரிந்தார்.

ஆட்டோ இன்டியூசர்

பாக்டீரியாக்களின் இந்த வேதிச்சொற்களை 'ஆட்டோ இன்டியூசர்கள்' (Autoinducer) அல்லது சுருக்கமாக AI என்று சொல்கிறார்கள். அதுமட்டுமல்ல, பாக்டீரியா எனும் 'தொகுதி'யை (phylum) தனியாகவும், விப்ரியோ (vibrio) என்ற 'பேரின'த்தை (genus) தனியாகவும், பிச்சரி (fischeri) என்ற 'இன'த்தை (species) தனியாகவும் பிரித்துப்பார்ப்பதற்காக, மூன்று வகை வேதி-வார்த்தைகளை இவை உபயோகிக்கின்றன. அதாவது, தன்னுடைய ஒரே இனத்தை 'நான்'(AI-1) என்றும், தம் பேரினத்தை தெரிந்துகொள்ள, 'நீ'(CAI-1) என்றும், மற்றும் மற்ற வகை பாக்டீரியாக்களை தெரிந்துகொள்ள 'நாம்' (AI-2) என்றும் வெவ்வேறு வேதிப்பொருட்களை இவை சுரக்கின்றன.

மனிதனுக்கு தீங்கு விளைவிக்கக்கூடிய பாக்டீரியாக்களும், இந்த தொழிற்நுட்பத்தை பயன்படுத்துகின்றன. மனித உடலில் நுழைந்த உடன், சிறிய எண்ணிக்கைகளில் இருக்கும்போது, இவை எந்த தீங்கும் செய்யாமல், இனப்பெருக்கம் மட்டுமே செய்துகொண்டிருக்கும். மனித செல்லை தாக்குவதற்கு தேவையான அளவு நச்சு-புரதங்களைச் சுரக்க, போதிய அளவு தங்களின் சகாக்களின் எண்ணிக்கை பெருகிய பிறகு, எல்லோரும் சேர்ந்து ஒரே நேரத்தில் அந்த புரதங்களைச் சுரந்து நமக்கு நோய் விளைவிக்கின்றன. இந்த ஒரு செல் உயிரிகளிடம் இந்த அளவுக்கு ஒழுங்குகள் இருப்பது ஒரு புறம் அதிர்ச்சியாயும் இருக்கிறது. ஆனால், ஒரே ஒரு செல்லை மட்டும் கொண்ட இந்த உயிரிகளே இத்தனை அறிவுடன் செயல்பம்டுபோது, நம்மையெல்லாம் சொல்லவா வேண்டும்.

பாக்டீரியாக்கள் பேசும் அதே வார்த்தைகளைப்போல அமைப்பைக்கொண்ட வேறு வேதிப்பொருள்களை அராய்ச்சியாளர்கள் தயாரித்து, இந்த பாக்டீரியா இருக்கும் இடத்தில் சேர்த்து  சோதித்துப் பார்த்தனர். இதனால், குழப்பமடைந்த பாக்டீரியாக்கள் தங்கள் சகாக்கள் எல்லாம் இல்லை என்று நினைத்து நோய் உண்டாக்காமலே இருந்ததை அவர்கள் கண்டறிந்துள்ளனர். வருங்காலத்தில் மருந்து எதிர்ப்புசக்திகொண்ட நோய் உண்டாக்கும் பாக்டீரியாக்களின் எண்ணிக்கை அதிகமாகிக்கொண்டிருப்பதால் (தொடர்புடைய பதிவு), இந்த தொழிற்நுட்பம் பாக்டீரியாக்களினால் ஏற்படும் நோயிகளிலிருந்து பாதுகாத்துக்கொள்ள பயன்படும் என்று நம்பப்படுகிறது.

இந்த கண்டுபிடிப்புகளை நிகழ்த்திய, நிகழ்த்திக்கொண்டிருக்கிற அறிஞர்களுக்கும், இன்னும்  அறிவியலின் உச்சங்களை தேடும் பணியில் ஈடுபட்டிருக்கும் பல்லாயிரக்கணக்கான ஆராச்சியாலர்கள், அவர்களின் மாணவர்கள் என்று அனைவருக்கும் நம் பாராட்டுதல்களை தெரிவித்துக்கொள்வோம்!

பி.கு.: அட இது பரவாயில்லை, பாக்டீரியாக்கள் எழுந்து நின்று நடந்து செல்வதைக்கூட நம்ப படமா எடுத்து வெச்சுருக்கோம் தெரியுமா (இணைப்பு)??

என்.டி.எம்-1 (NDM-1) இதுதான் இன்று உலகம் முழுதும் செய்தி ஊடகங்களின் முதற்பக்கங்களை அலங்கரித்துக்கொண்டிருக்கும் பெயர். ஆங்கிலத்தில் New Delhi Metallo-1 என்பதன் சுருக்கம் தான் இந்த என்.டி.எம்-1. இது ஒரு புரதம். இந்த புரதத்தை தயாரிக்கக்கூடிய மரபணுவைக்கொண்ட பாக்டீரியாக்கள், நாம் பயன்படுத்தும் நுண்ணுயிர்கொல்லிகள் பலவற்றிலிருந்து அவற்றைக் காப்பாற்றும் ஆற்றல் கொண்டது, முக்கியமாக பீட்டா லாக்டம்கள் (beta lactum) என்ற வகையைச்சார்ந்த மருந்துகளை (எ.கா. பென்சிலீன்) செயலிழக்கச்செய்யும் தன்மையைக்கொண்டவை. இவ்வகை ஜீன்களை எம்.பி.எல் (MBL)அல்லது (Metallo Beta Lactamase) என்று அழைப்பார்கள். இந்த புதிய எம்.பி.எல் நாம் முன்னமே அறிந்திருக்கும் எம்.பி.எல் களை விட வேறுபட்டவையாக இருக்கின்றன. இதை சிலர் ‘சூப்பர் பக்’ (super bug), அதாவது மிகையான ஒரு உயிர் என்று அழைக்கின்றனர். இதற்கு மும் எம்.ஆர்.எஸ்.ஏ (MRSA – Methecilin Resistant Staphylococcus Aureus) என்ற பாக்டீரியாவை சூப்பர் பக் என்று அழைத்தனர். ஆனால், இந்த மரபணுக்கு அல்லது புரதத்துக்கு இந்த பெயர் ஏற்புடையதல்ல. இதனால் ஒரு பாக்டீரியாவை சூப்பர் பக்-காக ஆக்கமுடியல்லாம் ஆனால், இதுவே ஒரு சூப்பர் பக் அல்ல என்பது என் வாதம்.

மேலும், ஊடகங்கள் ‘கிட்டத்தட்ட அனைத்து (most)’ மருந்துகளையும் எதிர்க்கக்கூடியது என்று சொல்கிறார்கள். அந்த ‘கிட்டத்தட்ட அனைத்து’ என்பதன் விளக்கமென்ன? எவை எல்லாம் இதில் அடங்கும்? ஏனென்றால், இந்த என்.டி.எம்-1 ஐ முதலில் அறிமுகப்படுத்திய ஆய்வுக்கட்டுறை இவை புளூரோகியூனளோன்கள் மற்றும் கோளிஸ்டின் (fluoroquinolones and colistin) வகை மருந்துகளுக்கு கட்டுப்படுவதாக குறிப்பிட்டுள்ளனர். என்.டி.எம்-1 வகை எம்.பி.எல் கள் முதன்முதலில் ஜப்பான் நாட்டில் 1991ம் ஆண்டு கண்டுபிடிக்கப்பட்டன. இவை பெரும்பாலும் இண்டகிராண்கள் (integrons) என்று சொல்லக்கூடிய மரபணுக்களுடன் சேர்ந்து காணப்படுபவை. இண்டகிராண்கள் அதனுடன் இருக்கும் ஜீன்களை வேறு உயிரிக்கு தானாக எடுத்துச்செல்லும் குணம் கொண்டவை. இவை பாக்டீரியாக்களில் மருந்து எதிர்ப்பு சக்தியை பரப்புவதில் பெரும்பாலும் அறியப்படுபவை. நமக்கு முன்னமே தெரிந்த பழைய எம்.பி.எல் கள் எப்படி, எங்கே தோண்றின என்ற ஆராய்ச்சி இப்போது நமக்கு வேண்டாம், ஆனால் இந்த என்.டி.எம்-1 எனும் புதிய வகை எம்.பி.எல் இந்தியாவில் முதன்முதலில் கண்டுபிடிக்கப்பட்டுள்ளது.

இதன் எதிரொலியாக, பிரித்தானிய அரசு தமது மக்களை இந்தியாவிற்கு மருத்துவத்திற்காக செல்ல வேண்டாம் என்று அறிவுறித்தியுள்ளது. மருத்துவ சுற்றுலா என்பது இந்தியா பொருத்தவரை, உலகில் மிகவும் பிரபலமான ஒன்று. இதனால் கிட்டத்தட்ட அரசுக்கு ஆண்டொன்றுக்கு 1200 கோடி ரூபாய்கள் வருமானம் வருகிறது. இந்திய அரசு, பிரித்தானிய அரசின் இத்தகைய செயலுக்கு கடும் அதிர்ப்தி தெரிவித்துள்ளது. இன்றைய தேதிக்கு, பல நூறு பாக்டீரியாக்கள் மற்றும் ஜீன்கள் மருந்தெரிப்பு கொண்டவைகளாக இருக்கின்றன. அவை வெவ்வேறு நாடுகளில், வெவ்வேறு சூழல் மற்றும் மனித நடவடிக்கை  காரணங்களால், இயற்கையால் உருவாக்கப்படுகின்றன. ஆனால், ஒவ்வொருமுறை இந்த பாக்டீரியாக்களோ, ஜீன்களோ கண்டுபிடிக்கப்பட்டபோது, இதுபோலவே அந்நாட்டிற்கு செல்லவேண்டாமென்று ஏதேனும் அரசுகள் நாட்டு மக்களை அறிவுறித்தியதா என்று கேட்டால், அப்படி ஒரு செய்தி இதுவரை இல்லை. ஏன், எம்.ஆர்.எஸ்.ஏ என்றழைக்கப்படும் பல மருந்தெதிர்ப்பு சக்தி வாய்ந்த பாக்டீரியா பிரித்தானியாவில் முதன்முதலில் 1961ல் கண்டுபிடிக்கப்பட்டபோது இப்படி ஒரு நிலை ஏற்பட்டதா? பின் 1981 ஆண்டு இதே வகை அமேரிக்காவில் கண்டுபிடிக்கப்பட்டது. இன்று உலகம் முழுதும் இந்த வகை பாக்டீரியாக்கள் இருக்கின்றன.  இதை பிரித்தானியாவில் உருவாகி பின் மற்ற நாடுகளுக்கு பரப்பப்பட்டது என்று சொன்னால் அதை அவர்கள் ஏற்றுக்கொள்வார்களா?

கடைசியாக, இப்போது இந்திய அரசாங்கமும், ஊடகங்களும், என்.டி.எம்-1 ஐ கண்டுபிடித்தவர்களை தூற்றவும், பழிபோடவும் ஆரம்பித்திருக்கிறார்கள். இது தொடர்பாக முதன்முதலில் வெளியிடப்பட்ட ஆய்வுக்கட்டுரையைப் படிக்கும்போது, இதற்கு இந்தியாவை சம்பந்தப்படுத்திப் பெயர் வைத்திருப்பது ஒரு தவறாகத்தோண்றவில்லை. ஏனெனில், ஒரு புதிய ஜீனை கண்டுபிக்கும்போது, அதைக் கண்டெடுத்த இடத்தின் பெயரை சூட்டுவது வழமைதான். ஆனால், இது ஒரு திட்டமிட்ட சதி என்று குற்றச்சாட்டு வைக்கப்படுகிறது. மேலும், இந்த ஆராய்ச்சிக்கு பொருளுதவி செய்வது ஒரு மருந்து தாயாரிக்கும் நிறுவனம் என்பதால் அந்த நிறுவனத்தின் நலனுக்காக புணையப்பட்ட செய்தி இதுவென வாதாடுகிறார்கள்.

எது எப்படியோ, இப்போது செய்யவேண்டியதெல்லாம், இந்த வகை எதிர்ப்புசக்தி மற்ற பாக்டீரியாக்களுக்கு பரவாமல் தடுப்பதையும், அதற்கான மாற்று மருந்துகள் கண்டுபிடிக்கவும் வேண்டிய வழிமுறைகளை அறிவியல் பூர்வமாக ஆராய்வதே. அதை விட்டுவிட்டு, தொழிற்போட்டியோ அரசியலோ அறிவியலில் தலையிடுமானால், பாக்டீரியாவிற்கும் மனிதனுக்கும் நடக்கும் இந்த தொழிற்நுட்ப போரில் தோற்கப்போவது மனிதன் மட்டுமே. 

அமேரிக்காவை சேர்ந்த உயிரியல் விஞ்ஞானிகள் இணைந்து செயற்கையாக தயாரிக்கப்பட்ட மரபணுவைக்கொண்டு (DNA) முதன்முதலில் ஒரு உயிரியை உண்டாக்கி இயங்கவைத்திருக்கிறார்கள்.  கணினி மென்பொருளின் உதவியுடன் வடிவமைக்கப்பட்ட மரபணுவை வேதிப்பொருட்களின் உதவியுடன் ஆய்வகத்தில் தயாரித்து, 'மைக்கோபிலாசுமா மைக்கோய்டீசு' என்ற பாக்டீரியாவை முழுமையாக இயங்கவும், உயிர்வாழவும் மற்றும் இனப்பெருக்கம் செய்யவைத்து வெற்றியடைந்துள்ளனர். இதுவரை, சிறு சிறு ஜீன்களை பாக்டீரியாக்களில் செலுத்தி தேவையான புரதங்களை தயாரித்துக்கொண்டிருந்தோம். இப்போது, முழுமையாக ஒரு பாக்டீரியாவை செயற்கையான முறையில் உயிர் வாழ மற்றும் இனப்பெருக்கம் செய்யத் தேவையான ஜீன்களை வரிசைப்படுத்தி அதை தயாரித்து அதற்கேற்றார்போல இயங்கவும் வைத்திருக்கிறோம்.  இதன்மூலம், எரிபொருள், மருந்துகள், கழிவுகளை அகற்றும் பணிகள், காற்றை சுத்தப்படுத்துதல், கரியமிலவாயுவை அகற்றுதல்  போன்ற பல வேலைகளை செய்யும் செயற்கை உயிரிகளை நம்மால் உருவாக்க முடியும்.

இந்த சாதனையின் மூலம் பல நன்மைகள் இருந்தாலும், இரண்டுபக்கமும் கூர்மையான கத்தியைப்போன்று அபாயகரமானதும் கூட. இதை ஆயுதங்களாகவும், அழிவு வேலைகள் செய்யக்கூடிய உயிரினங்களாகவும் பயன்படுத்த முடியும். அப்படி ஏதேனும் நடந்தால் அது மனித இனத்தின் அழிவின் ஆரம்பமாக முடிந்துவிடும். மனித இனத்தின் மேம்பாட்டுக்காக பயன்படுத்தப்படும்வரை இந்த வெற்றி மதிப்புடையதாய் இடுக்கும். 

'சயின்ஸ்' (Science) என்ற உலகப்புகழ்பெற்ற ஒரு ஆய்விதழில் இந்த பணியை பதிவுசெய்துள்ளனர் (http://www.sciencemag.org/cgi/content/abstract/science.1190719) இதை உருவாக்கிய ஆராய்ச்சியாளர்கள். அறிவியலின் அலவுகோள்களை மாற்றியமைத்த இந்த மனிதர்களுக்கு எம் மானசீக வணக்கங்கள்.